विराटनगरबाट सवारी चालक अनुमति पत्र वितरण हुने

मोरङ । प्रदेश नं १ को राजधानी विराटनगरबाट सवारी चालक अनुमति पत्र वितरण गरिने भएको छ । 

प्रदेश नं १ का यातायात व्यवस्था तथा सञ्चार मन्त्री उपेन्द्र घिमिरेले यातायात व्यवस्था कार्यालयको सेवा कार्यालय विराटनगरमा लिखित तथा प्रयोगात्मक परीक्षा दिने व्यवस्था  मिलाइएको जानकारी दिनुभयो ।

विराटनगरका सेवाग्राहीले यसअघि सुनसरीको इटहरीबाट  सवारी चालक अनुमति पत्र लिने गरेका थिए ।

यातायात व्यवस्था सेवा कार्यालय विराटनगर–४ मा सवारी चालक अनुमति पत्र लिनका लागि अनलाइन फाराम भर्ने कार्य सुरु गरिएको मन्त्री घिमिरेले बताउनुभयो ।  

कार्यालयले आगामी एक हप्ताभित्र  लिखित र प्रयोगात्मक परीक्षा लिने व्यवस्था मिलाएको छ । प्रदेशमा सुनसरीको इटहरी, झापाको बिर्तामोड, इलाम, धनकुटा र उदयपुरबाट चालक अनुमति पत्र वितरण गर्ने गरिन्छ ।रासस 

प्रकाशित मिति : १३ श्रावण २०७९, शुक्रबार  ९ : ०२ बजे