काठमाडौं । नेकपा एमालेकी सांसद पद्माकुमारी अर्यालले वर्तमान सरकारले ल्याएको बजेट योजनाभन्दा बढी गफ भएको बताउनुभएको छ ।
बिहीबार संसदमा बजेटमाथिको छलफलमा भाग लिँदै सांसद अर्यालले बजेटमा कार्यक्रमहरु धेरै ल्याइएको तर आवश्यक बजेट विनियोजन नभएको बताउनुभयो । ‘ बजेटबिनाका यतिधेरै कार्यक्रमहरु छन्, त्यो व्याख्या गरिसाध्य छैन। त्यसैले यो बजेट ‘गफै त हो नी सम्धी’ भनेजस्तै छ।’अर्यालको भनाई थियो ।
पूर्वमन्त्री समेत रहनुभएकी अर्यालले अहिलेको बजेटले कृषि क्षेत्रमा भएका अध्ययन, छलफल र तथ्यांकलाईसमेत बेवास्ता गरेको बताउनुभयो । कृषि मन्त्रालयले आगामी वर्षका लागि योजना र रणनीति बनाइसकेको अवस्थामा मन्त्रालयको योजना र रणनीतिलाई बजेटले लत्याएर हचुवाको भरमा बजेट ल्याइएको उहाँले बताउनुभयो ।
अर्यालले बजेट पुरै पूर्वाग्रही भएकोसमेत बताउनुभयो । यसअघिको सरकारले सिद्धार्थ र कोहलपुर राजमार्ग विस्तार र स्तरोन्नती गर्न ७ अर्ब विनियोजन गरेर डिपिआर बनिसकेको र ठेक्का गर्न सक्ने अवस्थामा पुगिसक्दा पनि अहिलेको बजेटले प्राथमिकता नदिको उहाँले बताउनुभयो । ‘पोखरा र लुम्बिनी जोड्ने सिद्धार्थ राजमार्ग र कर्णाली जोड्ने कोहलपुर राजमार्ग यो सरकारको प्राथमिकतामा नपर्नुको कारण के हो ?’ उहाँले प्रश्न गर्नुभयो ।
प्रकाशित मिति : १९ जेष्ठ २०७९, बिहिबार ४ : ५८ बजे
प्रतिक्रिया