हेटौंडा । नेकपा एकीकृत समाजवादीको अध्यक्ष पदबाट राजीनामा दिएका श्रीधर पोखरेल नेकपा एमालेको चुनावी प्रचारप्रसारमा व्यस्त हुन थालेका छन् ।
बुधबार हेटौंडामा पत्रकार सम्मेलन गरेर चुनावपछि पार्टी कमजोर हुने भन्दै उहाँले पार्टी परित्यागको घोषणा गर्नुभएको थियो । त्यस लगतै बिहीबार उहाँलाई काठमाडौंमा एमालेका अध्यक्ष केपी ओलीले एमाले प्रवेश गराउनुभएको थियो ।
पोखरेल अहिले हेटौंडाका उम्मेदवारसँग चुनावी प्रचारप्रसारमा व्यस्त हुन थाल्नुभएको छ । हेटौंडा ५ मा भएको चुनावी प्रचारप्रसार कार्यक्रमलाई सम्बोधन गर्दै पोखरेलले नेकपा एस कांग्रेसको ‘एस’ भइसकेको बताउनुभयो । उहाँले नेकपा एससँग कुनै विचार र दृष्टिकोण नभएको बताउनुभयो ।
‘एसको विचार केवल एमालेलाई कमजोर बनाउने र नेपाली कम्युनिस्ट आन्दोलनलाई समाप्त पार्नेभन्दा अरू कुनै छैन,’ उहाँले भन्नुभयो । अनन्त पौडेलको नेतृत्वमा हेटौंडालाई सुन्दर बनाउने अभियानमा सबैजना लाग्नुपर्ने उहाँको भनाई छ ।
प्रकाशित मिति : १६ बैशाख २०७९, शुक्रबार ५ : १६ बजे
प्रतिक्रिया