काठमाडौँ । भन्सार एजेन्टको विज्ञापनको एक वर्षपछि परीक्षा सञ्चालन हुने भएको छ ।
भन्सार विभागले सार्वजनिक सूचना जारी गरी आगामी वैशाख १७ गतेका लागि लिखित परीक्षा तय गरेको छ ।
परीक्षा रोक्न माग गर्दै परेको रिट निवेदनमाथि सुनुवाइ गर्दै उच्च अदालत पाटनले चैत १३ गते यसअघिको अन्तरिम आदेशलाई निरन्तरता दिन नपर्ने आदेश दिएपछि परीक्षा हुने भएको हो ।
आरक्षण व्यवस्था नगरिएको भन्दै क्रिष्टिना थैवले भन्सार विभागविरुद्ध उच्च अदालत पाटनमा रिट दायर गर्नुभएको थियो । थैवले भन्सार एजेन्ट सम्बन्धी सो विज्ञापनमा आरक्षण कोटा राख्नुपर्ने भन्दै माग दाबी गर्नुभएको थियो
गत वर्ष १६ चैतमा भन्सार एजेन्ट इजाजत पत्रका लागि दरखास्त भएको थियो ।
भन्सार एजेन्टको परीक्षा सोही वर्षको २२ जेठ र २९ माघमा तोके पनि दुवै पटक स्थगित भएका थिए । यसअघि २८ फागुनमा परीक्षा तय भए पनि मुद्दाका कारण रोकिएको थियो ।
६६० पदका लागि साढे ९ हजारले आवेदन दिएको भन्सार विभागले जनाएको छ ।
प्रकाशित मिति : २१ चैत्र २०७८, सोमबार ७ : ३७ बजे
प्रतिक्रिया