बुटवल । लुम्बिनी प्रदेशमा २२ चैत अर्थात् मङ्गलवारदेखि बालबालिकालाई टाइफाइड विरुद्धको खोप लगाइने भएको छ ।
प्रदेश स्वास्थ्य निर्देशनालयका अनुसार लुम्बिनी प्रदेशका १२ जिल्लामा खोप कार्यक्रम सञ्चालन गर्न लागिएको हो ।
प्रदेशमा खोप लगाउनुपर्ने १५ महिनादेखि १५ वर्ष उमेरका बालबालिकाको जनसङ्ख्या १३ लाख छ ।
स्वास्थ्य कार्यालय रुपन्देहीका खोप अधिकृत भेषराज शर्माले लुम्बिनीमा १३ लाख १३ हजार ९८९ लाई टाइफाइड विरुद्धको खोप लगाउने तयारी भएको जानकारी दिनुभयो ।
उहाँले टाइफाइडबाट बच्नका लागि थाइपोइड खोप लगाउने तयारी भएको जानकारी गराउनुभयो । उहाँले भारतमा उत्पादित खोपको प्रभावकारिता ९६.९५ प्रतिशत रहेकोले डर नमानी खोप लगाउन आग्रह गर्नुभयो ।
खोप अभियान २८ चैतसम्म सञ्चालन हुनेछ । विद्यार्थीको वार्षिक परीक्षा भएकोले वैशाख अघि नै खोप अभियान सकिने स्वास्थ्य निर्देशनालयले जनाएको छ ।
दूषित पानीको कारणले लाग्ने टाइफाइड, अस्पताल भर्ना हुनेको कारणमध्ये चौथो कारण भएकोले अभियान नै सुरु गरेर कार्यक्रम गर्न लागिएको स्वास्थ्य निर्देशनालय लुम्बिनीका प्रवक्ता रोशनलाल चौधरीले जानकारी दिनुभयो ।
यो अभियान पहिलो पटक चलेको बताउँदै आगामी दिनमा नियमित लगाउन मिल्ने गरी अगाडि बढिने उहाँको भनाइ छ ।
प्रकाशित मिति : २० चैत्र २०७८, आइतबार ८ : २४ बजे
प्रतिक्रिया