काठमाडौँ । जावलाखेलको खेल मैदानमा जारी २३औँ पुष्प मेलामा ३६ हजार ८०० जनाले अवलोकन गरेका छन् ।
मेलामा ८४ लाख ३० हजार रुपियाँको कारोबार भएको छ । फ्लोरिकल्चर एसोसिएसन नेपालको आयोजनामा चैत १० गतेदेखि सुरु भएको मेलामा पहिलो दिन आठ हजार २०० जनाले अवलोकन गरेका थिए । उक्त दिन २१ लाख ५० हजार रुपियाँको कारोबार भएको थियो ।
चैत ११ गते अर्थात् दोस्रो दिन ११ हजार जनाले अवलोकन गरेका थिए । उक्त दिन २७ लाख रुपियाँ बराबरको कारोबार भएको थियो । शनिवार तेस्रो दिन १७ हजार ८०० जनाले अवलोकन गरेका छन् । र, शनिवार ३५ लाख ८० हजार रुपैयाँको कारोबार भएको एसोसिएसनका महासचिव विश्वमणि पोखरेलले जानकारी दिनुभयो।
शनिवार भएकाले अरू दिनको तुलनामा अवलोकनकर्ताको चाप रहेको उहाँले बताउनुभयो । एसोसिएसनले ४५ हजार जनाले अवलोकन गर्ने र ७५ लाख रुपैयाँ बराबरको कारोबार हुने लक्ष्य थियो ।
मेलामा अवलोकनकर्ताले सबभन्दा बढी बहुवर्षे फुल्ने फूलप्रति बढी आकर्षण भएको देखिएको र त्यही बढी मात्रामा खरिद गरिरहेको महासचिव पोखरेलले बताउनुभयो ।
प्रकाशित मिति : १३ चैत्र २०७८, आइतबार ७ : २९ बजे
प्रतिक्रिया