काठमाडौँ । नेपालका लोपोन्मुख, सीमान्तकृत, अति सीमान्तकृत र पछाडि पारिएका आदिवासी समुदायका महिला र किशोरी / युवतीहरूको सशक्तीकरणका लागि आयोजित राष्ट्रिय स्तरको आदानप्रदान तथा अन्तरक्रिया कार्यक्रम मङ्गलवार सम्पन्न भएको छ।
राष्ट्रिय जनजाति महिला मञ्च (निफ) द्वारा आयोजित सो कार्यक्रम फागुन १ देखि ३ गतेसम्म काठमाडौँमा आयोजना गरिएको हो ।
निफका परियोजना संयोजक अमित तामाङका अनुसार ३ दिने अन्तरक्रियामा ८ वटा आदिवासी समुदायका ४० जना किशोरीहरूले भाग लिएका थिए ।
लोपोन्मुख वनकरिया र हायु, अति सीमान्तकृत थामी र चेपाङ, सीमान्तकृत पहरी, सुनुवार र तामाङ र लाभबाट वञ्चित छन्त्याल समुदायका किशोरी तथा महिलाहरूको कार्यक्रममा सहभागिता रहेको थियो ।
राष्ट्रिय स्तरको सो अन्तरक्रिया कार्यक्रममा सहभागी गराउनु अघि ८ वटै समुदायका किशोरीहरूलाई २० जनाको समूहमा पहिले नै स्थानीय स्तरमा ४ दिने नेतृत्व विकास तालिम दिइएको निफका उपाध्यक्ष यशोकान्ति भट्टचनले चक्रपथ डटकमलाई बताउनुभयो ।
उपाध्यक्ष भट्टचनका अनुसार सीमान्तकृत तथा लोपोन्मुख किशोरीहरू बसोबास गर्ने क्षेत्रमा पुगेर सो तालिम दिइएको थियो ।
काठमाडौँमा मङ्गलवार सम्पन्न राष्ट्रिय स्तरको कार्यक्रममा भने प्रत्येक समुदायबाट ५ जना किशोरीहरूलाई प्रतिनिधित्व गराइएको हो ।
सहभागीहरूले आदिवासी जनजाति, सीमान्तकृत तथा लोपोन्मुख किशोरीहरूका मुख्य मुद्दाहरूका बारेमा छलफल गरेका थिए । साथै, आफ्ना निश्चित समान सवालहरू र चुनौतीहरूको समाधानको लागि के गरिनुपर्छ भन्ने सवालमा समेत आदिवासी जनजाति समुदायका किशोरीहरूले समुदायगत प्रस्तुति राखेका थिए ।
परियोजना संयोजक अमित तामाङका अनुसार स्थानीय सरकार, प्रदेश र केन्द्र सरकार र आदिवासी संस्थाहरूले के के गर्नुपर्छ भन्ने विषयमा पनि सहभागी किशोरीहरूले सुझावहरू तयार पारेका छन् ।
कार्यक्रममा प्राप्त सुझावहरूलाई निकट भविष्यमा आयोजना हुने राष्ट्रिय स्तरको संवाद कार्यक्रममा सरोकारवालाहरू माझ पेस गर्ने निफको योजना रहेको तामाङले बताउनुभयो ।
साथै, तीन दिने अन्तरक्रियाको क्रममा नेपालको आदिवासी आन्दोलनमा आदिवासी युवाहरूको संलग्नता र युवा सँग सम्बन्धित विद्यमान नीति तथा योजनाबारेको बुझाइमा हेमन्त कुमार राईले सहजीकरण गर्नु भएको थियो ।
त्यसैगरी, 'जलवायु परिवर्तनबारेको बुझाई र राष्ट्रिय तथा अन्तर्राष्ट्रिय स्तरमा जलवायु परिवर्तन सम्बन्धी संयन्त्र र प्रक्रियाहरूमा आदिवासी युवाहरूको संलग्नता' विषयमा टुंगा भद्रा राईले र 'आदिवासी जनजातिको अधिकारसम्बन्धी संयुक्त राष्ट्रसङ्घीय घोषणापत्र र आदिवासी किशोरी र महिलाको अधिकारहरू बारेको बुझाई' बारे स्टेला तामाङले सहभागी किशोरीहरूसँग प्रयोगात्मक अन्तरक्रिया गर्नुभएको थियो ।
राष्ट्रिय जनजाति महिला मञ्च (निफ) ले स्थानीय पहलहरूको लागि क्यानडा कोषको आर्थिक सहायतामा नेपालका लोपोन्मुख, सीमान्तकृत, अति सीमान्तकृत र पिछडिएका आदिवासी समुदायका महिला र किशोरी/युवतीहरूको सशक्तीकरणका लागि सो राष्ट्रिय स्तरको आदान प्रदान तथा अन्तरक्रिया कार्यक्रम सञ्चालन गरेको हो ।
कार्यक्रमको अन्तिम दिन ८ वटा समुदायका किशोरीहरूले आदिवासी किशोरी मञ्च (फिग) गठन गरेका छन् । आफ्नो अधिकारका लागि सङ्गठित भई काम गर्नका लागि मञ्च गठन गरिएको फिगका अध्यक्ष एन्जेलिका भयलले बताउनुभयो ।
प्रकाशित मिति : ५ फाल्गुन २०७८, बिहिबार १ : ५७ बजे
प्रतिक्रिया