कैलाली । कैलालीमा लागुऔषधको कारोबार भइरहेको भन्दै मोबाइल पसलमा छापा हान्न गएका प्रहरीले नै मोबाइल चोरिरहेको भिडियो सार्वजनिक भएको छ । मोबाइल चोरिरहेको भिडियो सार्वजनिक भएपछि संलग्न प्रहरीमाथि कारबाही सुरु भएको छ ।
कैलालीको धनगढीमा सुवास रावलले सञ्चालन गरिरहेको ग्लोबल मोबाइल ग्यालरीमा छापा पार्न गएका प्रहरीले मोबाइल पसलबाट दुई वटा मोबाइल चोरेका थिए ।
माघ ५ गते साँझ ८ बजे धनगढीको चौराहमा रहेको ग्लोबल मोबाइल ग्यालरीमा जिल्ला प्रहरी कार्यालयको टोली लागुऔषधका विषयमा छापा हान्न पुगेको थियो ।
सो क्रममा मोबाइल ग्यालरी सञ्चालक रावलका भाइ पर्ने दोर्णबहादुर रावलसहित तीन जनालाई प्रहरीले पक्राउ गर्दै उनीहरुको साथबाट १ ग्राम ५५० मिलिग्राम खैरो हिरोइन बरामद गरेको थियो ।
प्रहरीले मोबाइल पसलको खानतलासी लिनेक्रममा मोबाइल चोरी रहेको सिसि क्यामरामा कैद भएको भिडियोमा देख्न सकिन्छ । मोबाइल चोरीको भिडियो सार्वजनिक भएपछि प्रहरीले जिल्ला प्रहरी कार्यालय कैलालीमा कार्यरत एक जना हवलदार र अर्का एक जवानलाई हिरासतमा राखी कारबाही अगाडी बढाएको छ ।
मोबाइल ग्यालरीका सञ्चालक सुवास रावलले भिडियो प्रमाणसहित प्रहरी कार्यालयमा निवेदन दिएपछि घटना बाहिरिएको हो ।
प्रकाशित मिति : ७ माघ २०७८, शुक्रबार १२ : ५५ बजे
प्रतिक्रिया