काठमाडौँ । उपराष्ट्रपति नन्दबहादुर पुनले मुलुकभर कोरोनाको जोखिम बढेकाले स्वास्थ्य सुरक्षाको मापदण्ड पालना गरेर माघेसंक्रन्ति पर्व मनाउन आह्वान गर्नुभएको छ ।
माघे सङ्क्रान्ति पर्वका अवसरमा आज शुभकामना सन्देश दिँदै उहाँले कोरोना भाइरस (कोभिड–१९) को अर्को लहर तीव्र रूपमा फैलिरहेकाले कोरोना नियन्त्रण, रोकथाम तथा उपचारका लागि सरकारले लिएको निर्णयको पालना गर्न सबै नागरिकलाई आग्रह गर्नुभयो ।
माघेसंक्रान्ति पर्वले कोरोना भाइरसको तेस्रो लहरलाई नियन्त्रण गर्न सबै नेपालीलाई एकताबद्ध हुन ऊर्जा प्रदान गर्ने उपराष्ट्रपतिको विश्वास छ ।
उहाँले मुलुकको दिगो विकास, स्थायी शान्ति, संविधानको संरक्षण र पूर्ण पालन, राजनीतिक स्थायित्व तथा मुलुकको समृद्धिका लागि जिम्मेवार हुन माघेसंक्रान्तिले सबै नेपालीलाई प्रेरणा देओस् भनी कामना गर्नुभएको छ ।
सूर्य धनु राशिबाट मकर राशिमा प्रवेश गरेको तिथिलाई आधार मानेर मगर, थारु र छन्त्याललगायत अन्य समुदायले नयाँ आर्थिक वर्ष प्रारम्भको रूपमा मनाउने माघेसंक्रान्ति पर्व मनाउने गर्दछन् ।
प्रकाशित मिति : १ माघ २०७८, शनिबार ७ : १८ बजे
प्रतिक्रिया