काठमाडौं । दसैँको शुभारम्भको अवसर पारेर नेकपा एमाले काठमाडौं महानगर कमिटीले चंगा उडाउने प्रतियोगिता आयोजना गर्ने भएको छ ।
एमालेनिकट अखिल नेपाल किसान महासंघ काठमाडौं महानगर र राष्ट्रिय युवा संघ नेपाल काठमाडौं महानगर कमिटीले संयुक्त रूपमा ुमहानगरस्तरीय चंगा प्रतियोगिताु आयोजना गरेका हुन् ।
प्रतियोगिता काठमाडौंको टुँडिखेलमा भोलि शनिबार अपराह्न ११ देखि सुरु हुने आयोजकले जनाएको छ । प्रतियोगितामा दुई सयभन्दा बढी सहभागी हुने र दुई हजारभन्दा बढीले अवलोकन गर्ने अनुमान गरिएको छ ।
एमालेका पोलिट्ब्युरो सदस्य एवं पूर्वमन्त्री रामेश्वर फुयाँलले संस्कृतिको संरक्षणका लागि चंगा उडाउने प्रतियोगिता आयोजना गरिएको बताए । उनले उपत्यकाबासीलाई प्रतियोगितामा सहभागी हुन आग्रह गरे ।
ुचाडपर्वका बेला चंगा उडाउने परम्परा हाम्रो मौलिक परम्परा हो,ु उनले भने, ुतर अहिले ठूलो संख्यामा युवा बिदेसिएको र भएका युवा पनि मोबाइल, ट्याब, गेमिङलगायतमा व्यस्त हुने गरेकाले सबैको ध्यान आकृष्ट गर्न प्रतियोगिता नै आयोजना गरेका हौं ।ु यसबाट मनोरञ्जनका साथै हाम्रो धर्म, संस्कृति र परम्पराको जगेर्नामा सहयोग पुग्ने उनको विश्वास छ ।
एमालेले गत वर्षदेखि चंगा उडाउने प्रतियोगिता सुरु गरेको हो । प्रतियोगितामा गत वर्ष १०५ जना सहभागी भएका थिए ।
प्रकाशित मिति : ११ आश्विन २०८१, शुक्रबार ३ : ०९ बजे
प्रतिक्रिया