तनहुँ । ऋषिङ गाउँपालिकाको आयोजनामा जारी दोस्रो पालिका स्तरीय अध्यक्ष कप भलिबल प्रतियोगितामा शुक्लागण्डकी नगरपालिका फाइनलमा प्रवेश गरेको छ ।
मङ्गलवार भएको पहिलो सेमिफाइनल खेलमा भिमाद नगरपालिकालाई पराजित गर्दै शुक्लागण्डकीले फाइनल यात्रा तय गरेको हो ।
भिमादलाई शुक्लागण्डकीले ३–१ को सेटमा पराजित गर्दै फाइनलमा स्थान सुरक्षित गरेको छ ।
पहिलो सेटमा भिमादले शुक्लागण्डकीलाई २५–१७ को फराकिलो अन्तरमा पराजित गर्न सफल भयो । दोस्रो सेटबाट खेलमा सुधार गरेका शुक्लागण्डकीका खेलाडीले लगातार तीन सेट आफ्नो पोल्टामा पारे ।
दोस्रो, तेस्रो र चौथो सेट क्रमशः २५–१९, २५–२१ र २५–२३ को स्कोरमा विजयी हुँदै भिमादको फाइनलमा पुग्ने लक्ष्यमा शुक्लागण्डकी बाधक बन्यो ।
फाइनलमा शुक्लागण्डकीले आज स्याङ्जाको बिरुवा गाउँपालिका वा बागलुङको गलकोट नगरपालिका मध्य एकसँग भिड्नेछ । दोस्रो सेमिफाइनलमा आज बिरुवा र गलकोट भिड्दै छन् ।
शुक्लागण्डकी गत वर्ष भएको पहिलो संस्करणको ऋषिङ अध्यक्ष कपको उपाधि विजेता हो ।
ऋषिङको झापुटार खेल मैदानमा जारी प्रतियोगितामा पहिलो, दोस्रो, तेस्रो र चौथो हुने समूहले क्रमशः एक लाख ४० हजार रुपैयाँ, एक लाख रुपैयाँ, ६० हजार रुपैयाँ र ३० हजार रुपैयाँको साथमा शिल्ड, मेडल र प्रमाणपत्र प्राप्त गर्नेछन् । उत्कृष्ट खेलाडीलाई पनि नगद सहित पुरस्कृत गरिनेछ ।
आइतबारदेखि सुरु प्रतियोगितामा तनहुँको व्यास नगरपालिका, भिमाद नगरपालिका, शुक्लागण्डकी नगरपालिका, म्याग्दे गाउँपालिका, आँबुखैरेनी गाउँपालिका, घिरिङ गाउँपालिका, स्याङ्जाको बिरुवा गाउँपालिका, पुतली बजार नगरपालिका, अर्जुनचौपारी गाउँपालिका, कास्कीको मादी गाउँपालिका, रुपाकोट गाउँपालिका, बागलुङको गलकोट नगरपालिका, नवलपुरको बौदीकाली गाउँपालिका गरी १६ समूहले सहभागिता जनाएका छन् ।
प्रकाशित मिति : २२ मंसिर २०७८, बुधबार ८ : १६ बजे
प्रतिक्रिया