पेरिस । हिन्द-प्रशान्त क्षेत्रमा सहकार्य गर्न फ्रान्सेली राष्ट्रपति इम्यानुअल म्याँक्रोले भारतीय प्रधानमन्त्री नरेन्द्र मोदीसँग प्रस्ताव गरेका छन् । अस्ट्रेलियाले फ्रान्ससँग गरेको ४२ अर्ब डलर वरावरको परमाणु सम्झौता रद्द गरेको पृष्ठमूमिमा मोदीसँगको टेलिफोन संवादमा राष्ट्रपति म्याँक्रोले यस्तो प्रस्ताव गरेका हुन् ।
हिन्द-प्रशान्त क्षेत्रमा खुला र समावेशी ढंगले संयुक्त ढंगले अगाडि बढ्ने दुबै नेताले सहमति जनाएका छन् । संवादका क्रममा भारतको उद्योग र प्रविधिलाई सशक्त पार्ने बारेमा राष्ट्रपति म्याँक्रोले फ्रान्सको प्रतिबद्धता दोहोराएका थिए । त्यस अवसरमा म्याक्रोले दुई देशको साझेधारी क्षेत्रीय, स्थायित्व र विधिको शासन प्रबद्र्धनमा केन्द्रित हुने बताएका थिए ।
संवादमा अफगान संकटबारे पनि छलफल भएको म्याँक्रोको कार्यलयद्वारा जारी विज्ञप्तिमा भनिएको छ ।
अस्ट्रेलियाले हिन्द महासागरमा चल्ने परम्परागत पनडुब्बी निर्माण गर्ने बारेमा सन् २०१६ मा फ्रान्ससँग गरेको सम्झौता रद्द गरेको थियो । उसले परमाणु उर्जामा चल्ने आठ ओटा पनडुब्बी निर्माणका लागि अमेरिका र वेलायतसँग यसै साता सम्झौता गरेको छ । अकस नाम दिइएको सो सम्झौतापछि अमेरिका, वेलायत र अस्ट्रेलियासँग फ्रान्स क्रुद्ध छ ।
अन्तिम समयमा आएर अस्ट्रेलियाले धोका दिएको फ्रान्सले आरोप लगाएको छ ।
एजेन्सी
प्रकाशित मिति : ६ आश्विन २०७८, बुधबार २ : १६ बजे
प्रतिक्रिया