कठमाडौँ । सौर्य एयरलाइन्सको जहाज दुर्घटनामा मृत्यु भएकाहरुको शव पोष्टमार्टमको तयारी सुरु भएको छ । पोष्टमार्टमका लागि मृतक सबैको शव त्रिवि शिक्षण अस्पताल पुर्याइएको छ भने अहिले आवश्यक कागजपत्र मिलाउने काम भइरहेको छ ।
अहिले दुर्घटनामा मृत्यु भएकाहरुको शवको मुचुल्का बनाउने काम भइरहेको छ । यो कागजी कामहरु सकिने बित्तिकै पोष्टमार्टम सुरु हुने प्रहरीले जानकारी दिएको छ ।
पोष्टमार्टमका लागि अस्पतालको जनशक्ति तयारी अवस्थामा रहेको अस्पतालका निर्देशक डा. दिनेश काफ्लेले जानकारी दिनुभयो ।
जलेर मृत्यु भएका कारण शवहरुको पोष्टमार्टम दिनमा मात्रै गर्न सकिने उहाँले बताउनुभयो । ‘शव चिनिने अवस्था छैन । हामीले दाँत हेरेर पहिचान गर्नुपर्छ । नभए सबैको डीएनए नै परीक्षण गर्नुपर्ने हुन्छ,’ उहाँले भन्नुभयो ।
प्रकाशित मिति : ९ श्रावण २०८१, बुधबार ४ : ४३ बजे
प्रतिक्रिया