विराटनगर । परीक्षा हुनुभन्दा दुई घण्टा अगाडी प्रश्नपत्र आउट गरेको आरोपमा प्रहरीले पूर्वाञ्चल विश्वविद्यालयका कर्मचारीसहित १० जनालाई पक्राउ गरेको छ ।
मोरङ प्रहरीले एक जना कर्मचारी र ९ जना विद्यार्थीहरूलाई पक्राउ गरेको हो । प्रहरीले ८ जना विद्यार्थीहरूलाई शनिवार राती काठमाडौँबाट पक्राउ गरी मोरङ लगेको हो ।
अन्य दुई जनालाई विराटनगरदेखि पक्राउ गरिएको हो । यस घटनामा मोरङ प्रहरीले ८ वैशाखमा सप्तरी घर भएका महेश यादवलाई पक्राउ गरी ‘शिक्षा ऐनमा’ म्याद थप गरी अनुसन्धान गर्दै आएको छ ।
वैशाख ३ गते पूर्वाञ्चल विश्वविद्यालय अन्तर्गतको इन्जिनियरिङ संकायको स्नातक दोस्रो सेमेस्टरको फिजिक्सको परीक्षा हुनुभन्दा दुई घण्टा अगाडी प्रश्नपत्र बाहिरिएको थियो । १ बजेदेखि हुने फिजिक्सको परीक्षाको प्रश्नपत्र ११ बजे नै आउट भएको खुलेको छ ।
परीक्षा अघि प्रश्न पत्र सार्वजनिक भएपछि परीक्षा नियन्त्रक कार्यालयका प्रमुख प्राडा सूर्यप्रसाद सङ्ग्रौलाले तत्काल अर्को प्रश्नपत्र बनाएर परीक्षा लिएका थिए । पश्नपत्र आउट भएपछि अनुसन्धान गर्न मोरङ प्रहरीमा निवेदन दर्ता गराएका थिए ।
प्रकाशित मिति : १२ बैशाख २०७८, आइतबार ४ : ०० बजे
प्रतिक्रिया