स्वरोजगार कोषको सहयोगले व्यवसायगर्न हौसला मिल्यो

काम कहिल्यै ठुलो सानो हुँदैन, बस दिगोपना आवश्यक छ, सुदिप राईको निरन्तरताले आज उनलाई एक सफल र मेहनती ग्रिल व्यवसायी साबित गराएको छ । उदयपुरको चौदण्डीगडी नगरपालिका ७ बिपिचोकमा उनको ग्रिल कारखाना छ ।

विगत ५ वर्षदेखि विपिचोकमा ग्रिल कारखाना खोलेका उनलाई यही व्यवसायले राम्रो आम्दानी गराएको छ । आफु १६/१७ बर्षको उमेरमै कतारमा वैदेशिक रोजगारीका लागि गएका सुदिपले २ वर्षसम्म पनि खासै कमाइ गर्न सकेनन् । २ बर्ष विदेशमा बसेपछि आफनो समय त्यसै खेर गइरहेको उनलाई महसुस भयो त्यसपछि उनी स्वदेश फर्किए । नेपाल फर्किएपछि उनले ग्रिल काटेर मिलाउने काम काठमाडौंमै बसेर सिके । सुदिप भन्छन, सीप त काठमाडौंमा बसेर सिके तर व्यवसाय गर्न पैसा थिएन त्यही समय स्वरोजगार कोषले दिएको एक लाखले व्यवसाय गर्न सजिलो भयो । हरेक कुरामा पैसा नै जोडिनेहुँदा कहाँबाट जुटाउने ? धितो के राख्ने भन्ने झण्झट भइरहन्थ्यो सुदिपले भने । स्वरोजगार कोष अन्र्तगत नजिकैको नवदुर्गा सहकारीले सस्तो व्याजमा ऋण दिएपछि गाउँमै काम गर्ने जाँगर बढेको उनले सुनाए । विदेशबाट फर्किएपछि अर्कै देशमा जाने योजनाले सिकेको ग्रिलको तालिम बल्ल उनले आफनै गाउँमा प्रयोग गर्न पाए । यस क्षेत्रमा काम गरिरहेका व्यक्तिहरुको अनुभवबाट मैले निकै सानो लगानीबाट यो व्यवसायमा अघी बढेको हुँ सुदिपले भने । सुदिपले अहिले आफनै ठाउँ बसाहा, फत्तेपुर, हडिया लगायतका क्षेत्रमा घरको रेलिङ्ग हाल्ने, आल्मुनियमको ढोका पार्टेसन गर्ने जस्ता काम गर्दे आइरहेका छन् । 

अहिले उनले त्यही ग्रिल व्यवसायबाट बर्षमा ४/५ लाख आम्दानी गर्ने गरेको सुनाए ।  उनी भन्छन, ‘स्वरोजगार कोषको ऋणले हामी जस्तो देशमै केही गछौ भन्नेहरुका लागि ठुलो सहयोग पुगेको छ । पैसा नहुदा साहुसँग ऋण माग्नु परयो, समयमा बुझाउन सकेन भने झनै तनाव बढने थियो ।’ सस्तो व्याजको ऋणले काम गर्न सजिलो भएको उनी बताउँछन । उनी भन्छन, हामी जस्ता पैसा नहुनेहरुलाई  व्यवसाय गर्न स्वरोजगार कोषले गरेको सहयोगले हौसला मिलेको छ । 
 

प्रकाशित मिति : १२ असार २०७८, शनिबार  ५ : ०० बजे