बुटवल । निर्माण कम्पनी चाइना स्टेट इन्जिनियरिङ कर्पोरेसनले समयमा काम नगर्दा पूर्व पश्चिम नारायणघाट बुटवल सडकको चोरमारा–अरुणखोला खण्डको अवस्था ‘हरिबिजोग’ बनेको पाइएको छ ् । करिब १७ अर्ब लागतमा निर्माणको काम जारी रहेको यो योजना लामो समयसम्म निर्माण सम्पन्न नहुँदा यात्रा गर्ने यात्रु र चालकले सास्ती खेप्दै आएका छन् ।
वर्षा सुरु भएसँगै राजमार्ग हिलाम्य भएको छ । वर्षामा चोरमारा–अरुणखोला–दुम्किबास, जङ्गल क्षेत्रमा रातोमाटो भएको स्थानमा सडक चिप्लो हुँदा पटक–पटक सडक अवरुद्ध हुने गरेको छ । अन्य स्थानमा समेत सडक हिलो हुँदा यात्रा कष्टपूर्ण हुने गरेको छ ।
दाउन्ने क्षेत्रमा समेत वर्षाका कारण सडक चिप्लो हुँदा सडक अवरुद्ध हुने गरेको छ । तर, दाउन्नेभन्दा अहिले चोरमार, अरुणखोला, दुम्किबासको जङ्गल क्षेत्रमा रातो माटोका कारण सडक चिप्लो भएर अवरुद्ध हुने जोखिम रहेको छ । रातो माटोका कारण यातायात अवरुद्ध हुने जोखिम रहेको ठाउँमा निर्माण कम्पनीलाई ग्राभेल थप्न भने पनि अहिले सम्म नगरेको सडक विस्तार योजना पूर्वी खण्डका योजना प्रमुख आशिष थापा मगरले बताउनुभयो ।
२०७५ माघमा सम्झौता भएर सडक विस्तारको काम थालिएको थियो । यसबीचमा दुई पटक म्याद थप गरिएको छ ।
सामान्य पानी पर्दासमेत सडक अवरुद्ध हुन थालेपछि स्थानीयहरूले चर्को विरोध गर्दै सामाजिक सञ्जालमा आक्रोश पोखेका छन् । रातो माटोको कारण सामान्य पानी पर्दासमेत सडक चिप्लो हुनगइ दुर्घटनाको जोखिम बढ्यो सामाजिक सञ्जाल प्रयोगकर्ता विनोद भट्टराइले बताउनुभयो । निर्माण स्थलमा निर्माण कम्पनीका प्राविधिक, कामदार र उपकरण समेत बिरलै देखिने गरेको उहाँले बताउनुभयो । ‘सायद नर्क जाने बाटो पनि यो भन्दा राम्रो होला’ फेसबुकमा भट्टराईले बाटोको दुरावस्थाको तस्बिर राख्दै आक्रोश पोख्नुभएको छ ।
नारायणगढ–बुटवल सडक विस्तार योजनाको दोस्रो पटक थपिएको म्याद आगामी ८ साउनमा सकिँदै छ । दोस्रो पटक थप गरिएको म्याद सकिने अवस्थामा पुग्दा नवलपरासी पूर्वी खण्डमा ५२ प्रतिशत काम मात्र सम्पन्न भएको छ । योजनाको पूर्वी खण्डमा गैँडाकोटको नारायणी पुलदेखि दाउन्नेसम्म ६५ किलोमिटर पर्दछ । चार ‘लेन’मा विस्तार गर्ने सडक दुईतर्फी गरेर १ सय ३० किलोमिटर कालोपत्र गर्नुपर्नेमा हाल दुईतर्फी गरेर ४४ किलोमिटर सडक कालोपत्र गर्ने काम सकिएको छ ।
कालोपत्र गर्नका लागि ६ दशमलव ६ किलोमिटर सडकमा बेस तयारी अवस्थामा रहेको छ । निर्माणको जिम्मा पाएको चाइना स्टेट कन्स्ट्रक्सन इन्जिनियरिङ कर्पोरेसनले अहिलेको म्याद रहेको अवधिमा नयाँ थप काम नगरे पनि कालोपत्रको लागि तयारी रहेको खण्डमा कालोपत्र गर्ने योजना बनाएको सडक विस्तार योजना पूर्वी खण्डका योजना प्रमुख आशिष थापा मगरले बताउनुभयो । बेस तयार भएको काम सके यात्रुलाई छरसात किलोमिटर थप यात्रामा सहज हुने उहाँले बताउनुभयो । हालको भौतिक प्रगति चाइना स्टेट कन्स्ट्रक्सन इन्जिनियरिङ कर्पोरेसनले प्रतिबद्धता गरेकोभन्दा कम भएको उहाँको भनाइ छ । ‘म्याद थप पछि जति गर्छु भनेको थियो त्यति भएन । सोअनुसार स्रोत परिचालित पनि भएन, उसको आन्तरिक कारणले पनि होला, अहिले त मौसमले पनि कामलाई घटाएको छ’, योजना प्रमुख मगरले भन्नुभयाे ।
म्याद सकिने अवस्थामा रहेकाले अब यो योजना कसरी सम्पन्न गर्न सकिन्छ, कसरी अगाडि बढ्ने भन्ने विषयमा छलफल चलिरहेको उहाँले बताउनुभयो । ‘नयाँमा अघि बढ्दा पनि समय लाग्ने हुन्छ, ५२ प्रतिशत सकिएको अवस्था छ, हालकै निर्माण कम्पनीबाट काम गरिसक्नु नै राम्रो हुनसक्छ’, उहाँले भन्नुभयो, ‘छलफल अघि बढ्दै छ, मुख्य कुरा अब यसको थप प्रगति कसरी छिटो हासिल गर्न सकिन्छ भन्ने नै हो ।’
यस खण्डमा पर्ने ठुला १२ वटा पुलमध्ये नौ वटामा ‘स्ल्याब’ राख्नेसम्मको काम भइरहेको छ । तीन वटाको समेत काम सुरु गरिएको छ । साना २२ वटा पुल निर्माण गर्नुपर्नेमा सबैको काम सम्पन्न भएको छ ।
नारायणगढ–बुटवल खण्डको एक सय १३ किलोमिटर सडकअन्तर्गत पूर्वी खण्डमा ६५ किलोमिटरमध्ये बजार क्षेत्रमा सर्भिस लेनसहित छ, दाउन्ने खण्डमा तीन र अन्य क्षेत्रमा चार लेनको सडक निर्माण गर्ने गरी काम अघि बढिरहेको छ ।
तस्बिर : Binod Bhattarai काे फेसबुकवालबाट
प्रकाशित मिति : २१ असार २०८१, शुक्रबार २ : ०९ बजे
प्रतिक्रिया