नियमावली ल्याएर गाँजा खेतीबारे अध्ययन गरिन्छ : गृहमन्त्री

काठमाडौं । उपप्रधान एवं गृहमन्त्री रवि लामिछानेले औषधिजन्य उपयोगकालागि गाँजाको व्यवसायिक खेतीसम्बन्धी अध्ययन सरकारले नियमावली ल्याएर गर्ने बताउनु भएको छ ।

सिंहदरबारमा शुक्रबार प्रतिनिधिसभा अन्तर्गतको कृषि, सहकारी तथा प्राकृतिक स्रोत समितिमा गाँजाखेतीका विषयमा छलफल भएको हो । औषधिजन्य प्रयोजनका लागि व्यवसायिक उत्पादन, प्रशोधन तथा बिक्री वितरण लगायतका विषयमा छलफल गर्न विभिन्न मन्त्रालयका प्रतिनिधि सहभागी हुनुहुन्थ्यो ।

गृहमन्त्री लामछिानेले गाँजाको औषधिजन्य उपयोगका लागि सरकारले नियम बनाउने विषय बजेटमा स्पष्ट भइसकेको भन्दै नियमावली ल्याएर नै अध्ययन गर्ने प्रष्ट पार्नुभयो । त्यस्तै उहाँले समितिको बैठक पक्ष र विपक्ष नरहेको भन्दै कतिपय ठाउँमा सबै एकै ठाउँमा उभिन सक्ने ठाउँ पनि रहेको धारणा राख्नुभयो ।

उहाँले भन्नुभयो, ‘सभापतिज्यू कतिपय ठाउँमा त हामी एकै ठाउँमा उभिनसक्ने ठाउँ पनि रहेछ नि । भनिन्छ नि, सबै एकै ठाउँमा उभिएको जस्तो समितिको बैठक यहाँपक्ष र विपक्ष रहेन । गजब लाग्यो, यो आफैमा एउटा महत्वपूर्ण कुरा हो ।’

त्यस्तै, बैठकमा बोल्दै अर्थमन्त्री वर्षमान पुनले गाँजाले बनेको झोला बोकेर आफूले बजेट प्रस्तुत गरेको बताउनुभयो । गाँजाको उत्पादन गाउँगाउँमा भइरहेको बताउँदै उहाँले अप्रत्यक्ष रूपमा खेती हुनु सामान्यजस्तो रहेको भन्दै दाना उत्पादन, रेसा उत्पादन भइरहेको भेटिने गरेको जानकारी दिनुभयो ।

प्रकाशित मिति : २५ जेष्ठ २०८१, शुक्रबार  ९ : २५ बजे