संघीय संसद्अन्तर्गत दुवै सदनको बैठक आज पनि

काठमाडौं । संघीय संसद्अन्तर्गत दुवै सदनको बैठक आज पनि बस्दैछ । तर सहकारी ठगीमा गृहमन्त्री रवि लामिछानेमाथि छानबिन समिति गठनको माग गर्दै आएको प्रतिपक्षी नेपाली कांग्रेसले संसदीय समिति गठनका विषयमा सहमति नभए अवरुद्ध पार्ने जनाएको छ ।

आज प्रतिनिधि सभाको बैठक बिहान ११ बजे र राष्ट्रिय सभाको बैठक दिउँसो १ः१५ बजेका लागि बोलाइएको छ । बैठकअघिसम्म संसदीय छानबिन समिति बनाउने विषयमा सहमति नभए कांग्रेसले अवरोध कायम राख्ने नेपाली कांग्रेसकी सचेतक सुशीला थिङले जानकारी दिनुभयो ।

बजेट अधिवेशनको सुरुवातदेखि नै कांग्रेसको अवरोधका कारण संसद्मा पेश भएको सरकारको आगामी वर्षको नीति तथा कार्यक्रम समेत पास भएको छैन् भने प्रधानमन्त्री पुष्पकमल दाहालले सोमबार कांग्रेस सांसदहरुको नाराबाजीकाबीच विश्वासको मत लिनुभएको थियो ।

प्रतिनिधि सभा र राष्ट्रिय सभा दुवैले सम्भावित कार्यसूची सार्वजनिक गरेको छ । दुवै सदनमा राष्ट्रपति रामचन्द्र पौडेलले १ जेठमा सदनम प्रस्तुत गरेको सरकारको नीति तथा कार्यक्रम टेबुल गर्ने कार्यसूची रहेको छ भने राष्ट्रपति कार्यालयबाट प्राप्त अन्य चिठीपत्रहरु पढेर सुनेर कार्यक्रम रहेको छ ।

कांग्रेस सचेतक थिङका अनुसार अहिले बिहान पनि दलहरूबीच संसदीय समिति गठनका विषयमा छलफल चलिरहेको छ । कार्यदलले समिति गठनका विषयमा सहमति जुटाएको अवस्थामा बाहेक संसद्मा कांग्रेसको अवरोध कायम रहने उहाँले बताउनुभयो ।

प्रकाशित मिति : ८ जेष्ठ २०८१, मंगलबार  ९ : ४४ बजे