दक्षिण अफ्रिकामा एउटा बस पुलबाट झन्डै ५० मिटर तल खस्दा ४५ जनाको मृत्यु भएको अधिकारीहरूले बताएका छन्।
उक्त दुर्घटनामा एकजना आठ वर्षीया बालिका जीवित भेटिएकी छन्। उनको अवस्था गम्भीर छ र अहिले अस्पतालमा उपचार भइरहेको छ।
उक्त बस उत्तरपूर्वी लिम्पोपो प्रान्तमा बारमा ठोकिएर दुर्घटनाग्रस्त भएको थियो र खसेपछि त्यसमा आगो लागेको थियो।
त्यो बसमा बोत्स्वानाको राजधानी गाबारोनेबाट मोरिया सहरमा इस्टरका निम्ति यात्रा गरिरहेका तीर्थयात्रीहरू रहेका थिए।
दक्षिण अफ्रिकाको सरकारी प्रसारक एसएबीसीका अनुसार बसले नियन्त्रण गुमाएपछि जोहानेसबर्गबाट करिब ३०० किलोमिटर उत्तरस्थित मोकोपेन र मर्केन बीचमा रहेको एउटा पुलबाट खसेको थियो।
बिहीवार साँझसम्म उद्धार कार्य सञ्चालन भएको थियो। मृतकमध्ये केहीको शव निकाल्न गाह्रो भएको बताइएको छ।
घटनास्थल पुगेका यातायात मन्त्री सिन्दसिवे चिकुङ्गाले बस दुर्घटनामा ज्यान गुमाएका व्यक्तिका परिवारप्रति समवेदना प्रकट गरिन्।
उनले दक्षिण अफ्रिकी सरकारले शवहरू हस्तान्तरण गर्न र दुर्घटनाको कारणबारे पूर्ण अनुसन्धान गर्न सहयोग गर्ने बताइन्।
"यो कठिन समयमा धैर्य धारण गर्ने शक्ति मिलोस् भनेर हामी कामना गर्छौँ," उनले भनिन्।
"हामी जिम्मेवारपूर्ण ड्राइभिङ गर्नुहोस् भनेर उच्च सजगता अपनाउन सधैँ आग्रह गर्छौँ।"
उनले इस्टर सप्ताहन्तमा धेरै मानिसहरू सडकमा निस्किएकाले पनि सुरक्षित ड्राइभिङको जिम्मेवारी सबैको भएकोमा जोड दिइन्।
दक्षिण अफ्रिका सडक सुरक्षा कमजोर भएको देशमध्ये पर्छ।
दुर्घटनाअघि त्यसै दिन जारी गरिएको इस्टरको सन्देशमा राष्ट्रपति सिरिल रामापोसाले पनि नागरिकहरूलाई "यसपालिको इस्टरलाई सुरक्षित इस्टर बनाउन सक्दो प्रयास गर्न" आह्वान गरेका थिए।
उनले त्यसमा भनेका छन्,, "हामी पछि पर्ने र हाम्रा सडकमा भएका दुर्घटना अनि घाइतेको तथ्याङ्क हेर्नका लागि हामीले कुरेर बस्नु हुँदैन।"
प्रकाशित मिति : १६ चैत्र २०८०, शुक्रबार १० : ३३ बजे
प्रतिक्रिया