मुगु । हातमा लौरी अनुहारमा कालो चस्मा लगाउने कल्से नेपाली मुगु जिल्लाका जन्मजात दृष्टिविहीन हुन् । उनी दैनिक जसो कहिले आफन्तको सहारा त कहिले एक्लै सदरमुकाम गमगढी बजार डुल्छन् ।
उनी डुल्ने एउटै उद्देश्य हो । कतै सार्वजनिक कार्यक्रम भए गीत गाउने । नेपाली गमगढीका चोक र गल्लीमा डुलेको सोह्र वर्ष भयो ।
गीत गाइसकेपछि कोही कसैले आर्थिक सहयोग गर्ने गर्दछन् । त्यही केही उठेको पैसाले कल्सेकाे कोठामा चुलो बल्छ ।
'पहिले-पहिले माया गरेर सबैले सहयोग गर्दथे। अहिले त कमैले हेर्छन्',उनले भने । कोठामा चामल, दाल तरकारी , नुन तेल जुटाउन पनि गारो भैसकेको नेपालीले गुनासो गरे ।
जन्मजात दुईवटै आँखा नभएका नेपालीलाई हाल कोठा भाडा तिर्न समेत मुस्किल भएको छ । 'भाडा नतिरेको लामो समय भयो । अहिले खासै कमाइ पनि छैन । घरबेटीले कोठा भाडा मागेर हैरान पार्छन्',उनले गुनासो गरे ।
उमेरले ५८ वसन्त पार गरेका नेपालीका तीन वटी छोरी सहित ५ जनाको परिवार छ । 'मैले सन्सार कस्तो छ भन्ने अनुभूति नगरे पनि तीन वटै छोरीलाई स्कुलमा पढाएर राम्रो शिक्षा दिएर सन्सार देखाउन पाएँ',उनले भने ।
'क' श्रेणीको अपाङ्ग भएकाले नेपाल सरकारबाट खतेड गाउँपालिका मार्फत ४ हजार र छायानाथ रारा नगरपालिकाबाट १५ सय पाउँदै आएका छन् ।
'यो संसार कस्तो छ भन्ने खुल्दुली भन्दा तीन वटी छोरी कसैले पढाउने जिम्मा लिइदिएको भए मलाई सन्सार देखे जस्तो त्यही हुने थियो',उनले भने ।
हेरन्डेक नामक गैर सरकारी संस्थाले हरेक महिना केही मात्रामा चामल, दाल , तेल नुन सहयोग गर्दै आएको उनले बताए । यतिले नपुगे पछि अहिले कल्से नेपालीलाई पाँच जनाको परिवार पाल्न धौधौ परेको छ ।
प्रकाशित मिति : २० पुस २०८०, शुक्रबार ३ : ४८ बजे
प्रतिक्रिया