सांसद कोइरीविरूद्वको मुद्दा आज ‘हेर्दाहेर्दै’ मा, भोलि पनि सुनुवाइ

काठमाडौ । प्रतिनिधिसभाका सांसद लक्ष्मी महतो कोइरीविरूद्वको मुद्दा आज (मंगलबार) हेर्दाहेर्दैमा राखिएको छ । एमाले सांसद कोइरीमाथि सशस्त्र प्रहरीका सहायक निरीक्षक (असई) थमन विकको हत्या गरेको आरोप लागेको छ ।

जिल्ला अदालत महोत्तरीमा न्यायाधीश उद्ववप्रसाद भट्टराईको इजलासमा भएको सुनुवाई आज नसकिएपछि ‘हेर्दाहेर्दै’ मा रहेको हो । मुद्दाको निरन्तर सुनुवाइ भोलि (बुधबार) जारी रहनेछ । २०७२ भदौ २५ गते मधेश आन्दोलनका क्रममा घाइते भएका सशस्त्र प्रहरीका असई विकलाई उपचारका लागि जलेश्वरबाट जनकपुर अस्पताल लैजाँदै गर्दा एम्बुलेन्सबाट झारेर हत्या गरिएको थियो ।

हत्यामा तत्कालीन मधेशवादी दलका नेता (हाल एमालेका निलम्बित सांसद) लक्ष्मी महतो कोइरीको पनि संलग्नता रहेको भन्दै मुद्दा दायर भएको थियो । त्यतिबेला कोइरीसहित २८ जनाविरुद्ध ज्यान मुद्दा दायर भएको थियो । जिल्ला अदालत महोत्तरीले ०७६ असोज २ गते महतोलाई एक लाख धरौटीमा छाड्न आदेश दिएको थियो । असई विकका आफन्त प्रेमबहादुर विक जिल्ला अदालतको आदेशविरुद्ध उच्च अदालत गएका थिए । उच्च अदालत, जनकपुरले ०७७ मंसिर १९ गते महतोलाई थुनामै राखेर मुद्दा अघि बढाउन आदेश दिए पनि त्यसयता कोइरी फरार छन् ।

प्रहरीको फरार सूचीमा रहेका कोइरी २०७९ मंसिर ४ गते भएको प्रतिनिधि सभा निर्वाचनमा महोत्तरी–१ बाट निर्वाचित भएका थिए । उनले वारेसमार्फत् प्रतिनिधि सभा सदस्यको उम्मेदवारी दर्ता गराएका थिए भने चुनाव जितेपछि प्रमाणपत्र पनि वारेसमार्फत् नै बुझेका थिए ।

निर्वाचनपछि महोत्तरीका सार्वजनिक कार्यक्रममा नदेखिएका कोइरी संसद भवन नयाँ बानेश्वरमा सपथ ग्रहण कार्यक्रममा सहभागी भएका थिए। त्यसपछि संसदका केही बैठकमा उपस्थित भए पनि प्रहरीले पक्राउ गर्ने तयारी गरेपछि फेरि फरार भएका हुन् । महोत्तरी जिल्ला अदालतमा कोइरीविरुद्धको मुद्दाको अन्तिम सुनुवाइ चलिरहँदा थमन विककी पत्नी शोभा गहतराज न्यायको माग गर्दै काठमाडौँ आएकी छन् ।

प्रकाशित मिति : २६ मंसिर २०८०, मंगलबार  ८ : ०४ बजे