उदयपुरमा धमाधम जग्गा नाप जाँच हुँदै

कटारी । उदयपुरको कटारी  नगरपालिका–१ कालीखोला गाउँबाट जग्गा नापी सुरु भएको छ । 

राष्ट्रिय भूमि आयोग उदयपुरका अध्यक्ष बलबहादुर तामाङका अनुसार पहिलो चरणमा ऐलानी जग्गाको नापी सुरु भएको हो ।

भूमिहीन दलित, सुकुम्वासी र अव्यवस्थित ढङ्गले बसोबास गरेकाहरूलाई  नाप जाँच गरेर जग्गाधनी प्रमाणपत्र प्रदान हुने अध्यक्ष तामाङले राससलाई बताउनुभयो । यस पटक कटारी नगरभित्रका सबै वडाको जग्गा नापी गरिने नगरपालिकाका प्रमुख राजेशचन्द्र श्रेष्ठले बताउनुभयो । नापी सुरु भएपछि भूमिहीनहरूमा पुनः उत्साह थपिएको छ । “नापीको काम सुरु भएको छ यस पटक समस्या समाधान हुने आशामा छौँ,”भूमि अधिकार मञ्च कटारीका अध्यक्ष बालकृष्ण थापाले भन्नुभयो । 

कटारी नगरपालिकाका प्रमुख प्रशासकीय अधिकृत अनिल किरातीले नगरभित्र जग्गा नापीको काम सुरु भएकाले अव भने भूमिहीन, सुकुम्वासी तथा अव्यवस्थितले लालपुर्जा पाउने गरी काम अघि बढेको बताउनुभयो । उदयपुरमा कटारीबाहेक बेलका, चौदण्डीगढी, त्रियुगा नगरपालिकामा जग्गा नाप जाँच भइरहेको आयोगको उदयपुर कार्यालयले जनाएको छ ।

रौतामाई गाउँपालिकामा पनि जग्गा नापी सुरु भएको आयोगका अध्यक्ष तामाङले बताउनुभयो । जिल्लामा जग्गा नापीको कामलाई तीव्रता दिएको बताउँदै उहाँले सबै स्थानीय सरकारसँगको सहकार्यमा नापीको काम पूरा गर्ने प्रतिबद्धता व्यक्त गर्नुभयो ।

प्रकाशित मिति : २३ मंसिर २०८०, शनिबार  ७ : ०१ बजे