काठमाडाैँ । शिक्षा विधेयककाे विराेधमा आन्दाेलनरत राहत शिक्षकपछि फुटपाथ व्यवसायीहरूले पनि काठमाडौं महानगरपालिकाको कार्यालय रहेको राष्ट्रिय सभागृह अगाडिकाे सडकमा सुतेर विराेध प्रदर्शन गरेका छन् ।
महानगरका मेयर बालेन शाहलाई आफ्ना माग पूरा गर्न दबाब दिने उदेश्यले उनीहरू सडकमै सुते विराेध गरेका हुन् ।
यसैबीच, तीन व्यवसायी संघठनले विज्ञप्ति जारी गर्दै मेयर शाहलाई ज्ञापनपत्रसमेत बुझाएका छन् ।
निरन्तर उभिएर आन्दोलनरत अभियन्ता ‘ई’ पक्षधर व्यवसायी र काठमाडौं महानगरबीचको मंगलवारको वार्ता निष्कर्षविहीन बनेको छ ।
महानगरले कुनै पनि ऐन र कानूनमा व्यवस्था नभएको विषयमा सहमति र सम्झौता गर्न नमिल्ने बताएकाे छ ।
काठमाडौँ महानगरपालिकाका प्रमुख बालेन शाहका सचिवालय सदस्य भूपदेव शाहले सामाजिक अभियन्ता ईः लाई सम्बोधन गर्दै सामाजिक सञ्जालमा मागहरु कानूनी, सामाजिक र प्राविधिक दृष्टिकोणले न्यायसंगत नभएको बताएका छन् ।
उनले कुनै पनि सरकारले आफ्नो मातहतमा नरहेको, आफ्नो पूर्ण क्षेत्राधिकारभित्र नपर्ने ऐन वा कानूनमा व्यवस्थान भएको विषयमा सहमति गर्न नसक्ने स्पष्ट गरेका हुन् ।
शाहले भनेका छन्, “वार्तामा हामीले आफ्नो सीमितताहरु पटकपटक दोहोर्याएका छौँ । मेरो विनम्र अनुरोध छ मित्र ई, आफ्नो स्वास्थ्यको ख्याल गरेर आन्दोलन फिर्ता लिइदिन। तिम्रो स्वास्थ्यका लागि म जिम्मेवारीबाट पछि हट्न पनि तयार छु।”
दुई पक्षबीचको वार्तामा चार बुँदे समझदारी पत्रको ड्राफ्ट गरिए पनि महानगर मेयर शाहले ड्राफ्टमा उल्लेखित केही विषयमा असहमति जनाएपछि वार्ता निष्कर्षविहीन बनेको छ ।
प्रकाशित मिति : १० आश्विन २०८०, बुधबार २ : ०४ बजे
प्रतिक्रिया