बारा । सरकारले धानको समर्थन मूल्य तोके पनि बारा जिल्लामा भने धान खरिदकर्ता र किसानहरू दुबिधामा परेका छन् ।
सरकारले धान खरिदकर्ता सहकारी र व्यापारीहरूलाई अनुदान नदिएसम्म समर्थन मूल्यमा धान किन्न नसकिने बारा जिल्लाका धान खरिदकर्ताहरूले बताएका छन् ।
हालै मात्र सरकारले मोटा प्रजातिका धानहरू, बिजी, राधा ४, सारो, सोनाको खरिद समर्थन मूल्य प्रतिक्विन्टल ३ हजार १९८ रुपैयाँ तोकेको छ यो गत वर्षको तुलनामा ३ सय ३० रुपैयाँले बढी हो ।
स्थानीय बजारमा मोटा प्रजातिकाको धानको मूल्य २८ सयदेखि २९ सय प्रतिक्विन्टल रहेको साना किसान कृषि सहकारी सङ्घ बाराका अध्यक्ष मिश्री लाल सहनीले जानकारी दिनुभयो ।
यस्तै मध्यम प्रजातिका धानहरूमा सोना मनसुली, सावित्री लगायत धानको खरिद मूल्य ३ हजार ३६२ रुपैयाँ प्रतिक्विन्टल तोकिएको छ । यो मूल्य गत वर्षको तुलनामा २ सय ३४ रुपैयाँ बढी हो । सरकारको मातहतको खाद्य संस्थानले पहुँचवाला र आफ्नो अनुकूल अनुसार समर्थन मूल्यमा धान खरिद गर्ने डुमरवानाका किसान माधव पाण्डेको आरोप छ ।
सरकारमा कर्मचारीतन्त्र हाबी भएकाले साना किसानलाई त धानको समर्थन मूल्य तोकेकोमा ‘कागलाई बेल पाक्यो हर्ष न बडाई’ भने जस्तो भएको उहाँको भनाई छ ।
गत वर्ष बाराका किसानले सरकारी मूल्य पाउने आशामा खाद्य संस्थान वीरगन्जमा बेच्न लगेको धान विभिन्न कारण देखाएर संस्थानले खरिद गर्न नसकिने बताएपछि व्यापारीको मूल्यमा बेच्न बाध्य भएको किसान मनहर्वाका प्रदीप मगरले गुनासो गर्नुभयो।
यता तराईको धानको मूल्य भने सरकारले तोके जस्तो नहुने र भारतको मूल्यमा निर्भर हुने भएकाले समर्थन मूल्यमा सरकारले नै खरिद गर्नुपर्ने सङ्घका अध्यक्ष मिश्रीलाल सहनी बताउनुभयो ।
प्रकाशित मिति : ५ श्रावण २०८०, शुक्रबार ७ : ३३ बजे
प्रतिक्रिया