नेपालगञ्ज / मुख्य निर्वाचन अधिकृतको कार्यालय नेपालगञ्जले बाँकेमा राजनीतिक दल र तिनका भ्रातृ सङ्गठनलाई निर्वाचन आचारसंहिताविपरीतका कार्य नगर्न सचेत बनाएको छ । सो कार्यालयमा आज बसेको बैठकले पोष्टर, ब्यानर, सार्वजनिक स्थान, मठमन्दिर, बिजुलीका तार, टेलिफोनका तारसमेतमा राखिएका चुनाव प्रचार–प्रसार साम्रगी तत्काल हटाउन निर्देशन दिएको छ ।
मुख्य निर्वाचन अधिकृतको कार्यालय नेपालगञ्जका मुख्य निर्वाचन अधिकृत खडानन्द तिवारीले सम्बन्धित दल वा भ्रातृ सङ्गठनले त्यस्ता प्रचार सामग्री नहटाए कार्यालयको टोलीले अनुगमन गरी प्रचार साम्रगी हटाउने जानकारी दिनुभयो ।
“त्यस्ता प्रचार सामग्री दल वा भ्रातृ सङ्गठनले नहटाए हामीले नै हटाउँछाँै”, उहाँले भन्नुभयो । उक्त कार्यालयले निर्वाचन आचारसंहिताविपरीतका कार्य रोक्न निर्वाचन अधिकृतको कार्यालयलाई समेत जानकारी गराएको छ । निर्वाचन आचारसंहिता, २०७८ ले व्यवस्था गरेबमोजिम स्थानीय निर्वाचनसम्बन्धी सम्पूर्ण व्यवस्थालाई पूर्णरूपमा पालना गर्न दलहरु सहमत भएका थिए ।
बैठकले स्थानीय तहको निर्वाचन स्वच्छ, निष्पक्ष र भयरहित वातावरणमा सम्पन्न गर्न सबै सरोकार भएकाहरुसँग समन्वय गर्दै काम गर्ने उल्लेख गर्दै मनोनयन दर्ता कार्यलाई शान्तिपूर्णरूपमा सहज ढङ्गले सम्पन्न गर्न सुरक्षा व्यवस्था नेपाल प्रहरी र सशस्त्र प्रहरीले मिलाउने निर्णय गरेको छ । जिल्लाका कतिपय ठाउँमा निर्वाचन आचारसंहिता उल्लङ्घनका घटना भएको उक्त कार्यालयले जनाएको छ ।
मुख्य निर्वाचन अधिकृतको कार्यालयले आइतबार ११ बजेदेखि ४ बजेसम्म राष्ट्रिय जनमुक्ति पार्टी, जनमत पार्टी, नेकपा माक्र्सवादी पुष्पलाल पार्टी, राष्ट्रिय प्रजातन्त्र पार्टी, नेकपा माले, विवेकशिल साझा पार्टीसहित छ पार्टीलाई उम्मेदवारी दर्ता गर्न समय दिएको छ । त्यस्तै नेकपा (एमाले), नेपाली कांग्रेस, जनता समाजवादी पार्टी, नेकपा (माओवादी केन्द्र), राष्ट्रिय सद्भावना पार्टी, नेकपा (एकीकृत समाजवादी) र लोकतान्त्रिक समाजवादी पार्टीलाई सोमबार उम्मेदवारी दर्ता गर्ने समय ११ बजेदेखि ३/३० बजेसम्म निर्धारण गरेको छ ।
प्रकाशित मिति : १० बैशाख २०७९, शनिबार ८ : ३० बजे
प्रतिक्रिया