हरियो रङ मतदाता र गणक मैत्री हुन्छ : निर्वाचन आयोग

काठमाडौँ  । निर्वाचन आयोगले आगामी स्थानीय तह निर्वाचनमा मतदाता र गणक मैत्री भएकाले सेतो कागजमा हरियो रङका चुनाव चिह्न सहितका विवरण राखेर मतपत्र तयार गर्ने निर्णय भएको स्पष्ट पारेको छ । 

मतपत्र र चुनाव चिह्नको रङका विषयमा उठेको प्रश्नको जिज्ञासामा आयोगका प्रवक्ता शालिग्राम शर्मा पौडेलले विगतका कतिपय निर्वाचनमा हरियो, कालो, नीलो र रातो चिह्न भएको मतपत्र प्रयोग हुँदै आएको जानकारी दिनुभयो । 

उहाँले भन्नुभयो,  “मतपत्र सङ्केत गर्ने मसी, निर्वाचन चिह्न, मतपत्रमा हुने रेखा र क्रमसङ्ख्या पनि नीलो भएका कारण मतदाताले गरेको मत सङ्केत स्पष्ट नभएको मात्र होइन, मतगणनामा सजिलो होस, मतपत्रमा गरिएको मत सङ्केत स्पष्ट देखियो भन्ने मनसायले  सेतो कागजमा हरियो निर्वाचन चिह्न, हरियो रेखा र हरियो क्रम सङ्ख्या राख्ने आयोगले निर्णय गरेको हो ।”

अघिल्ला निर्वाचनमा पनि हरियो, नीलो, रातो र कालो रङको निर्वाचन चिह्न भएको मतपत्रको अभ्यास भइरहेको आयोगको भनाइ छ । 

आयोगले आगामी वैशाख ३० गते हुने स्थानीय तह निर्वाचनका लागि आवश्यक मतपत्र छपाइ गर्दा मतपत्रमा छपाइ हुने चिह्न, विवरण तथा सुरक्षण चिह्न हरियो मसीले छपाइ गर्ने निर्णय गरेको सोमबार आयोजित पत्रकार भेटमा जानकारी दिइएको थियो । रासस

प्रकाशित मिति : २५ फाल्गुन २०७८, बुधबार  ७ : १५ बजे