काठमाडौँ । प्रधानमन्त्री शेरबहादुर देउवाले आज नेपाल बार एसोसिएसनका पदाधिकारीसँग छलफल गर्नुहुने भएको छ ।
प्रधानमन्त्रीको सरकारी निवास बालुवाटारमा प्रधानमन्त्री देउवाले बिहान साढे १० :०० बजे छलफलका लागि बोलाउनुभएको नेपाल बारका अध्यक्ष चण्डेश्वर श्रेष्ठले जानकारी दिनुभयो ।
प्रधानमन्त्री देउवाले नेपाल बार र सर्वोच्च अदालत बार एसोसिएसनका पदाधिकारीलाई छलफलका लागि बालुवाटार बोलाउनुभएको हो ।
प्रधानन्यायाधीश चोलेन्द्रशमशेर जबराको राजीनामा माग गर्दै एक महिनादेखि आन्दोलनरत बार र वृहत् नागरिक आन्दोलनले बिहीबार सर्वोच्च अदालतदेखि बालुवाटारसम्म मार्च पास गरेका थिए ।
गत सोमबार बारले प्रधानन्यायाधीश जबरा पदमुक्त हुनुपर्ने १७ कारण उल्लेख गर्दै सङ्घीय संसद्मा प्रतिनिधित्व गर्ने दललाई ध्यानाकर्षण पत्र बुझाएको थियो । उक्त ध्यानाकर्षण पत्र आज प्रधानमन्त्री देउवालाई पनि बुझाउने कार्यक्रम रहेको अध्यक्ष श्रेष्ठले बताउनुभयो ।
प्रकाशित मिति : १० मंसिर २०७८, शुक्रबार ८ : १४ बजे
प्रतिक्रिया