बाँके । बाँकेको जानकी गाउँपालिका वडा नम्बर ६ स्थित रहेको बाहुबली हर्ब प्रालि जडिबुटी उद्योगमा आगलागी भएको छ । बाँकेका प्रमुख जिल्ला अधिकारी श्रवण कुमार पोखरेलका अनुसार ब्यापारी राजेश जैनले संचालन गरेको जडिबुटी उद्योगमा बिहीबार बिहान ७ बजेको समयमा विद्युत् सर्ट भएर आगलागी भएको थियो ।
जडीबुटी प्रशोधन गर्ने बाहुबली हर्बल उद्योग प्रालिको परिसरमा राखिएका सल्लाको खोटो तथा दाउराबाट सुरु भएको आगलागी उद्योग सम्म पुगेकोले नियन्त्रणमा लिन समस्या भईरहेको जिल्ला प्रहरी कार्यालय बाँकेका प्रहरी नायव उपरीक्षक नारायण डाँगीले जानकारी दिनुभयो ।
नेपालगन्ज विमानस्थलको दमकललगायत बाँकेका विभिन्न पालिकाका गरी ६ वटा, जिल्ला प्रहरीको वाटर क्यानल, बर्दियाका विभिन्न स्थानीय पालिकाका ३ वटा, रुपैडिहा भारतको एक गरी ११ वटा दमकलबाट आगलागी नियन्त्रणको प्रयास भइरहेको प्रमुख जिल्ला अधिकारी पोखरेलले जानकारी दिनुभयो ।
“उद्योगमा आगो पुगिसकेको छ, गोदाममा आगो पुगे पनि नियन्त्रण प्रयास जारी छ ।” प्रजिअ पोखरेलले भन्नुभयो, “सल्लाको खोटो भएका कारण तुरुन्तै नियन्त्रणमा ल्याउन सकिने अवस्था देखिँदैन, कठिन छ, उद्योगको गोदाम र कारखानातर्फ आगो फैलिएकोले नियन्त्रण प्रयास जारी छ,।”
आगलागी नियन्त्रणका लागि स्थानीय, प्रहरी, सशस्त्र प्रहरी, सेनासहित बाँकेका प्रजिअ श्रवणकुमार पोखरेल र प्रहरी प्रमुख प्रहरी उपरीक्षक तुलबहादुर कार्की, नेपालगंज उपमहानगरपालिकाका मेयर प्रशान्त विष्ट, व्यापारी नरेन्द्र ओलीसमेत आगलागी स्थलमा पुग्नुभएको छ ।
प्रकाशित मिति : ६ बैशाख २०८१, बिहिबार ९ : ५७ बजे
प्रतिक्रिया